ແນວຄວາມຄິດ “ຕົວເມືອງສີຂຽວ” ແມ່ນມີຄວາມເໝາະສົມທີ່ສຸດໃນການແກ້ໄຂບັນຫາສິ່ງທ້າທາຍ ແລະ ຊຸກຍູ້ໃຫ້ຕົວເມືອງ ໃຫ້ມີການພັດທະນາໄປຕາມທິດສີຂຽວຍືນຍົງ ທີ່ບໍ່ພຽງແຕ່ສົ່ງເສີມການເຕີບໂຕທາງດ້ານເສດຖະກິດເທົ່ານັ້ນ ແຕ່ຍັງຊ່ວຍຫຼຸດຜ່ອນການປ່ອຍທາດອາຍເຮືອນແກ້ວ ແລະ ມົນລະພິດ, ຫຼຸດຜ່ອນສິ່ງເສດເຫຼືອ, ສົ່ງເສີມການນຳໃຊ້ຊັບພະຍາກອນທຳມະຊາດຢ່າງມີປະສິດທິພາບ, ປົກປັກຮັກສາລະບົບນິເວດ ແລະ ຊີວະນາໆພັນໃຫ້ມີຄວາມຍືນຍົງ. ດັ່ງນັ້ນ,ນະຄອນຫຼວງວຽງຈັນ ຈຶ່ງໄດ້ສ້າງ “ແຜນຈັດຕັ້ງປະຕິບັດຕົວເມືອງສີຂຽວ (GCAP)” ສະບັບນີ້ຂຶ້ນ, ເພື່ອແນໃສ່ການພັດທະນາ ນະຄອນຫຼວງວຽງຈັນ ໃຫ້ມີຄວາມຍືນຍົງ ໂດຍການກໍານົດເອົາວິໄສທັດຕົວເມືອງສີຂຽວ, ເປົ້າໝາຍຍຸດທະສາດ, ຂົງເຂດບູລິມະສິດການພັດທະນາຕົວເມືອງສີຂຽວ ແລະ ໜ້າວຽກບູລິມະສິດໃນການຈັດຕັ້ງປະຕິບັດ ລວມເຖິງບັນດາໂຄງການທີ່ ນະຄອນຫຼວງວຽງຈັນ ຈະຕ້ອງໄດ້ເອົາໃຈໃສ່ຈັດຕັ້ງປະຕິບັດ ນັບແຕ່ມື້ຮັບຮອງແຜນຈັດຕັ້ງປະຕິບັດຕົວເມືອງສີຂຽວ ສະບັບນີ້ ຈົນເຖິງປີ 2030.